旁白：
十六七歲的杜煥混跡娼寮，手頭寬裕，結果染上毒癮。他從未讀過書，知識淺，喜歡在煙床上聽別人聊天，增長見聞。初乃淺嘗，後來毒癮愈來愈深，悔恨已晚，晚年常常自嘆鴉片貽誤一生。 他的毒癮是到一九七十年代初，六十多歲時才戒掉的。

曲詞：
一眾失明人我就唔多染，常常與開眼他群去食洋煙，因為我當時不知自曉呀，至使係洋煙卻，把那毒癖來纏。唉！所以為人出身咁就為緊要呀，凡事呀嘅做來要三思，皆因嗰陣呀我就唔識曉呀，至使被毒癖係一世纏。（說）在嗰陣時呀，香港有正式公煙賣吖嘛，咁所謂談話處，談話最好就在煙床呀。唉，呢啲係我哋生平係至愛嘅，愛咩嘢哩？愛人讀嘢俾自己聽呀。人講嘢自己聽呀，因為自己自小失明，未入過聖人門。係哩，一切嘅事哩都係靠人哋㗎嘛！吓，由隻耳聽入嚟，所以令得我津津有味嘞。唉，咁呀唯獨是呀，肯讀嘢俾你聽呢種人呀，係邊啲哩？係得閒無所是事呀，飽食用心呀，有其煙癮呀，在床對燈呀，咁至對你講嘢講得滋滋有味，然後自己呀至可以聽得入耳啫。哩！由淺入深 ……