搭食解決飯餐

搭食解決飯餐

吳瑞卿旁白:
舊時香港,搭食是普羅市民解決飯餐的其中方式。 第二次大戰之前,飯館和茶樓是不同的,茶樓以茶和點心為主。

杜煥講話:
未有佢(指其妻子)嗰陣時就搭食。舊時好多人搭食嘅香港。喺樓好多人搭人哋,有啲搭頭房,有啲搭二房,搭人哋啲有住家嘅食。有幾何同人出去食呀?冇嘅舊時。 舊時茶樓邊有飯賣!舊時茶樓冇飯賣,係自日本打七七盧溝橋事變後,香港啲茶樓至有飯賣咋!唔係冇嘅 。 (榮:啲茶樓淨係飲茶?) 飲茶、點心、包、餅食,係咁嘅咋!晏晝有啲荷葉飯,朝頭早亦有啲荷葉飯嘅咋,邊有飯賣?自係七七盧溝橋事變後,朝頭早就有啲牛腩飯呀,又話扣肉飯呀,肉飯呀,一盅盅咁賣嘅。舊時冇嘅,整整吓就有炒賣賣,舊時茶居邊有嘅。



無障礙網頁守則 (打開新視窗)