偷師南音編入粵曲

吳瑞卿旁白：
南音本來是失明瞽師或師娘賣唱為生的曲藝，後來粵劇和粵曲也有南音。 根據杜煥的回憶，粵劇著名的撰曲人例如吳一嘯、南海十三郎、朱頂鶴等，都是聽了瞽師唱南音而編入粵曲的。

杜煥講話：
朱頂鶴唱嗰支《賀新年》，之唔係平時聽我多，嗰支《睇燈》囉！嗰時晚晚喺度嘛，喺油麻地嗰邊。 撈呢行，撈偏門呢行，真係冇乜邊個唔識，所謂通宵達旦。差不多晚晚都有唱呢三兩支嘢嘞。《睇燈》呀，《別姬》呀，《偷詩稿》呀！好耐囉，嗰陣係歌林。等我想吓係邊個 …. 編曲，收尾啲粗嘢至係朱頂鶴編啫。三郎啩 …… 好似南海三郎，同埋吳一嘯。嗰支《偷香聖手》，入碟咪因為聽我哋唱《詩稿》唱得多，喺度編入去嘅囉。《偷香聖手》，嘿，唔知邊嗰入碟，唔記得咗。 點解我知道呢？因為臨到偷香嗰陣時，仍屬我哋唱南音嗰首咁嘅詞，咁尤其是知道係邊個打嘅 …… 喺我哋嗰支《夜偷詩稿》嚟編落去之嘛。 哩，家下朱頂鶴嗰支《賀新年》同埋嗰支《別姬》呀。佢晚晚喺處，喺張尾床位處，我唱就喺廳處唱，佢就縮埋喺裡面牙床，對住支死人燈，聽一句抄一句囉，聽一個字抄一個字，抄唔起咪聽晚囉。收尾返去咪編咗子喉囉 ……. 編咗段南音囉。