港人紛逃自由區

吳瑞卿旁白：
杜煥也曾經想過走難回大陸的自由區，但想到無以謀生，結果還是留在香港。

杜煥講話：
1943年嗰陣時我就咁嘅，日本佬嗰陣時好多事幹嘅。咁呀，燈火限制嘛，軍票一式化嘛。7月1號，燈火限制12點就要熄燈嘅嘞！咁就變咗 ….. 我做夜生活嘅，不嬲都靠呢啲地方嘛。所以一到熄燈啲人發茅嘞，唔敢叫啦。咦！諗吓都要趯路噃，我諗唔到自己會喺處過得嗰個時期嘅噃，因為啲行家趯唔少嘛。啲人趯路哂咁滯嘛，係剩我自己咁滯嘅啫，啲行家就。 嘿！死囉，幾十蚊軍票，百幾銀港銀，一火水罐米，一金魚缸，冚把冷（上去聲）幾乎凹哂嘞，凹剩嗰幾十蚊港紙唧，軍票都凹埋，米都凹埋嘞。弊嘞，要趯更？要趯去第二處？日本仔唔趯路哩，我哋冇地走嘅噃！只可去惠州呀上面嗰啲地方之噃。咁嗰啲地方，去自由區要唱粵曲嘛，南音就實唔得！唔會聽嘛！啲客家地方點會聽唱南音呀？