我想我本人乃系三不幸呀，一不幸者，自小家贫系贫贱嘅出身。二者生来时歪兼命蹇呀，在於幼年就惨呀遇，做咗个失明人。唉！因为以往嗰啲医术，未有今时咁掯 ………

正月十五时，系人人一样，我想哩，系周围都系挂新灯。咁不过各处系村乡就系各用品呀， 因为敝乡都系习惯呀，系有一样行。每个新丁都要用油糖兼共粉喎，煮其叫做茶嘅饭往去众分。唉！谁知我生来大体该定唔好命运呀 ………

虽然系搵到系有一个医生，唉！咁就得佢医得我啦，双目都渐将系明朗嗰阵咋，我哋爹娘见此亦都暂放人神。

唉！谁料嘞，大体系天注我今生就系苦命啩，大体该定我们系个破相身。嗰日娘亲欢喜抱住我去将系医生搵呀， 喺啦，谁料去到喇，去到佢医馆，喺罗，嗰个医生系松咗人。

（说） 民国哩，一到民国，唉！三年，初次水崩围，唉！我哋啲田地哩略有些少，崩溃去了。点想连气两年，弊罗！所谓就乙卯年喎我哋，中国哩最大西水嘞，当堂将田园尽冲破，整所屋宇楼房一切冲为平地，变咗哩，唉！先业呀，一切化为乌有嘞。唉！嗰阵剩落我哋父母，养着姊妹五人。

因为我本人曾经此， 系爹娘佢不明白，我又投错师。谁料嘞，卜算系嗰层，王分总系唔晓咋， 佢不过运红，一直系咁指地指天。唉！我哋双亲系见佢有咁好嘅生意， 至有将吾送去投学，无辜就误我三年。

咁就思量无奈嘞，走去广州先。唉！佢就带埋我去呀，贪我有少少见呀， 出入方便呀，咁就一齐共走，系走出到城池。初到呀，一到河南，去到聚龙城嗰边呀， 咁就寻到长庚里住居。 唉！因为在此一齐同埋，咁就过不少日子呀 ………

讲到音乐喎，音乐系嗰层，咁就全不晓咋，日日揸住两块系茅竹系人嘅门边， 无非系唱来句词有十零语，求他方便系两文钱。好彩哩，系嗰阵喎百物都犹贱呀，柴米又平共油盐。日中生活就易极了呀，无非两百钱足够两三天。 咁在此流连日日过了呀，转瞬系光阴又两年。

（说） 呀，咁呀不过年下有多哩，我就夜晚哩走上横珠桥。因为河南横珠桥哩，好多旧时嘅人就知道嘞，嗰啲盲人呀晚晚系处等人叫唱嘢。嗰度桥哩，就系河南潘老三建造，所以盲人哩，晚晚系处坐，有人叫盲公去唱嘢哩，就梗去嗰度桥处叫，咁嘅。咁我哩，食完饭嘞，日日去凭馆哩，赚得百零二百钱，咁就够食有馀，好丰裕𠻹 ………

因为系横珠桥坐处有十多廿个盲公系度吖嘛，有老有嫩吖嘛，系嘛，若为去小便喎，行到好远喎，好人逼嘅噃。嗰阵时嗰啲街道呀，好窄嘅啫。系哩，咁我又拖佢去哩，我恃住自己睇到吓吖嘛，咁呀拖佢嘞，有时又买熟烟喎，买两个仙烟，又陪佢去嘞，咁不论边一个，系喺横珠桥，系桥处坐喺处听生意嘅人哩，一样呀，听佢哋使，咁所以得佢啦横珠桥众行家，人人将己嚟到称赞 ………

适逢嗰位孙生佢就问起我嘞，嗰啲生活点维持？佢就考问我自小系学咗多共少呀，佢都问我从师学艺，学乜嘢先？唉！我听到亦都未能向佢发语罗，幸得系旁边有一个系佢代我开言。嗰个行家叫哩做呀，叫做系盲珍，佢姓吴原本就系番禺人。

（说） 因为我个师傅孙生呀，唔系讲大话，在河南地哩，就叫做教徒弟嘅唯一嘅嘞，吹亦会教你，弹亦会教你噃，唱会教你，卜算会教你，你唔学得系你嘅事。咁呀，唉，家阵我哋哩，家贫之过嘞，学佢嘢唔足，因为时间唔够呀，民国十二年入师，至到民国嘅十四年，我就逃至香港，之後哩，学师不足，学艺不贤，就系我嘞。唉，好彩哩，都学到普通些少搵食嘅门路呀。无非哩都系揸住弹筝唱南音之过，所以一生人，由此哩，在孙生嘅门下呀，吓，亦都得佢哩一番提携，该定噃，吓！我同佢个老豆呀都非常有缘，有缘到点哩，待我惨过亲生仔一般。

光阴似箭呀真快趣，转眼韶光就系民国十四年。忽然嘅夏季呀就多发现，哩！哩！哩！就系港九，港九市面嗰啲工人大大变迁，两地人人都话打点回家去，因为香港在嗰时就大起风潮。出口限他五元不能系多带转呀， 令到人人恐惧真系极三思。

我哋四人就在，系一九二六年嗰啲华人三月呀，嗰时正系三月十三夜间先，四人下落嗰只石岐花尾渡呀，要运其水路至到嚟。一夜系无事天明至嘞，一经系下昼就到石岐。住过一宵无别事呀，竟然佢要过别先，一到十四系嗰天就转过渡去，适逢去前山嗰边至得系澳门来。 嗰日在渡船所谓无别事呀， 顺其一现在上边，下回我当日，当日业呀， 至有顺带在渡船卖唱呀就顺收呀钱 ………

咁你不如在此系澳门住呀，又何须奔去香港咁然。既系本人无别事呀，无非为搵食呢两字先，自古处处皆是系风流地，那处嘅地头都有钱。 嗱，你若还听我就来劝此呀，不如你就在我呢一处居，讲到搵食哩系嗰层我就包咗你呀，若还唔够我可津贴钱。当堂我听罢回想自身 ………

（说） 初时到呀，系旺角，所以始终到家阵都系在旺角。初时在旺角哩就系新填地。系哩，後即变幻多时，迁居多处，唉真系呀想起上嚟，为人嘅劳碌呀，一好一丑，冥冥之中定然主宰。 （唱） 所以得到港呀，暂且安身，住埋成叠楼哩都系我哋嘅盲人，计起上来真系成冧人。日日如是日间动身，夜间无事只得系安寝呀，日中前去楼上逐主去唱歌文。

去到庙南街内把我一一系指明。故此就从今见得真高呀兴呀，哩，晚晚都如常去花界多经，有幸呀嗰啲花姑娘帮衬系极高呀兴呀，所谓初时所唱都系在门庭。人真怪呀，越见都越深，见得花界场中系入息嘅芸芸，好似夜夜系多人来帮衬，日间去搵食总无心 ……… （说） 嗰阵哩我初入花界嚟到捞，吓！好高兴。嗰啲大姑娘，所谓叫做老举，除非唔帮衬，帮衬过都有番头。所谓呀，初时在神厅，捞捞吓哩，吓，人客亦帮衬，捞捞吓就上到酒厅都有帮衬噃，吓，亦甚欢喜啦。所以哩，做咗夜生活嘞，吓！好开心呀，嗰年哩，啱啱就十七岁。

我无奈思量把口开。系啦，细想在河南咁就难得心中忍耐呀，日间系夜里都系搵食嘅唔来，点似哩返落去油麻地咁其在，所谓夜夜卖唱卖得几心开。 穿红着绿系兼自在呀，不如趁早就返回 ………

自从嚟到香港嘅地头。系卖唱维生真讲究，可谓情趣嘅生活秋过秋。出档卖唱晚晚有时候，晚晚如常走去助人哋风流。有时系助兴人哋饮酒呀，或时助兴呀唱助佢嘅温柔。总言系情景真系难讲够，就难讲得你透，系日常过去可谓乐无忧，或时无事来饮酒，或时三群两队日间在茶楼。晚上几个小时生活就做够，日间晚房日常系交朋结友 ………

一众失明人我就唔多染，常常与开眼他群去食洋烟，因为我当时不知自晓呀，至使系洋烟却，把那毒癖来缠。唉！所以为人出身咁就为紧要呀，凡事呀嘅做来要三思，皆因嗰阵呀我就唔识晓呀，至使被毒癖系一世缠。 （说） 在嗰阵时呀，香港有正式公烟卖吖嘛，咁所谓谈话处，谈话最好就在烟床呀。唉，呢啲系我哋生平系至爱嘅，爱咩嘢哩？爱人读嘢俾自己听呀。人讲嘢自己听呀，因为自己自小失明，未入过圣人门。系哩，一切嘅事哩都系靠人哋㗎嘛！吓，由只耳听入嚟，所以令得我津津有味嘞。唉，咁呀唯独是呀，肯读嘢俾你听呢种人呀，系边啲哩？系得闲无所是事呀，饱食用心呀，有其烟瘾呀，在床对灯呀，咁至对你讲嘢讲得滋滋有味，然後自己呀至可以听得入耳啫。哩！由浅入深 ………

七月系中旬又结识咗一位女流。初识系嗰时就在八音馆门口，如是系现方，系共在嗰周，适逢嗰晚夜两者系收工後呀，二人生活皆是系用咙喉 ……… 两家相会约定系在庙街口喎，故此二人来往系非是话几筹。近来话拍拖叫做双携手呀，哩，近日就明扬一对对，嗰阵我哋都略带偷。

初时共佢系结合後呀，就系吴松街上四七嘅号是三楼。两者嘅和谐指望白首呀，谁知天公唔就喇，你话哩有乜修。虽然卖唱仍属系生意够，竟然相聚一个年头，祖先哩有眼喇又继承有後， 添了一个男儿估话喎，估话无忧。 （说） 唉，人哋话三年抱两，我哩就五年抱三，竟然不就呀，唉，一定嘞。因为呀，所谓养育者无非系悭口之嘛。因为以往呀，育婴儿呢种程度哩，与今时真系相差好远好远，故此哩，先天虽系足，後天哩，养育不足，栽培不足，使我凄凉无限。

想来养儿嘅育女真系万种艰难。一个系不成，两个就又都难逃嘅限呀，第三个养来但愿生，谁知四个估话心方叹呀。唉！五岁嗰年又试命催残。想吓！想吓前时养育系婴儿非常艰患呀，令人每想甚难艰，栽培养育系非轻易呀，佢话养大喎一个孩儿，惨过过万重山，三朝七日都会有灾难呀，任得你养到非常趣致会趯会行。总系一时染着一病患呀，措手不及在时间。嗰阵系医学未有咁昌明，非轻容易除他患呀，故此人人知道婴儿育系难。

自从系小儿遇厄运呀，咁做剩下我夫妻一对及娘亲，仍属系街头嘅卖唱喎生活搵呀，如是者晚晚都系几条街嘅人。无非系几十年来都系三五条街嗰啲街坊帮衬嘅，好喇，并无去过别处奔。喺喇，光阴似箭呀，我唔够命运呀 ………

一到一九呀四零年系嘞丧娘亲，想来自嗟唔好运呀，一九四一年各人亦都便知闻。一到冬季十月到嘞，二十晨早就起战争，令到我两人真系心惊很呀，家无长物喎，又并无系值钱银。又更娇妻佢染病呀，呢个暗病都也曾久缠身。 喺嘞，经已系战争催逼近呀，果然令到我甚惊魂。正所谓生活全无又唔好家运呀，真系令吾每想系更伤心 ………

一九四一冬季後，突然港九又起祸殃，时晨早人人一见真系惊恐到非常。自从听了炮声响呀，娘儿个个系带着恐慌，哩，佢话九龙嗰边就更惨怆，系半日都唔够随街就抢米粮 ………

唉！所谓想来自思唔好嘅命罗，真系连气三年，年年都损兵。三九年不幸系儿丧呀命呀，时交已到一九四零，娘亲春季经丧命呀，一九四一年是嘅新正，佢就衰久嘅病咋，一到十五花灯竟嗰日丧幽灵。唉！嗰阵哩单单我独己来在家境呀，一切系家务尽见清。卖乾卖净咁就无，真至无物剩呀，几多贫苦捱得成。

一到正月廿七喎，闻来好佳音，每人系八两米系配一人。米单成了哩嗰阵粮食渐渐稳阵呀，唉！一路行来系咁过光阴。虽然我自己生意亦都略稳阵呀，总系眼看旁者真系无限伤神。一带系油麻地庙街佢人冧呀，常常皆有在街边系呻声音。但凡系空铺哩，即系殓房嘅命运呀，每间空铺晚晚都有死人。唉！尸横遍地真系情惨甚呀，见者流泪闻者亦伤心。我今，唉！提起亦都打冷震，油麻地系每日九龙一带真系饿死数百人。有啲归乡回去，唉！人冧冧呀 ………

谁料一九三年，系四三年嗰夜话截灯光，灯火限到夜深十二点正放喎，搞到街上又试再徬徨。限此地，限了火灯，满街满巷十二点就黑沉沉。令到我去街头卖唱都唔呀敢呀，就系嗰啲顾客也不放心，连日嘅连日过来都冇人帮衬，喺嘞，咁就越过日来更越沉 ………

适逢有位师娘与我年相近呀，偶然佢去岁去了夫君 正是新寡文君咁嘅身份呀，佢亦卖唱系为生过日辰。皆因系晚晚出档都相近呀，所以常常与佢有谈心，我想到系惊慌无可奈呀，至令与佢做系夫妇联群。与佢结婚就同相凭呀，双方依赖为谋生 ………

好喇，真快趣呀，又到系返和平，所谓和平复转灯光朗朗日清。当堂市面真系好高兴，连日系连夜连烧系炮竹唔停。人人享受世界安定呀，至令我哋卖唱之人生活就更醒呀，果然出档生意都唔停，真正嘅令人心高兴， ……… （说） 唉！所谓人人见到哩，光复呀！万众一心都欢喜啦，咁就唔止我嘞。所以我两人呀虽属系盲，究竟都系好安乐吖嘛，咁呀日日如常卖唱当然好啦，好高兴啦！周围个正所谓呀，万民乐业，鸡犬无惊，民丰物阜呗，当然高兴！战事平息可比死里逃生呀。咁呀我哋卖唱之人吖嘛，呀，生活就梗系好啦，系嘛？

（说） 喺喇，所谓好景不常，光阴似箭，嚟到一九五零年，忽然哩，所谓科学绝人呀，乜嘢哩？市面上一出咗呀呢个丽的呼声之後哩，弊嘞！我嘅生意哩，卖唱生意呀，一落千丈嘞，何以？因为我一向在九龙嗰方面哩，九龙嗰边呀，工人区居多，所以判嘅电哩就由包租嘅主权，故此收音机哩，以往虽系有呀，就未曾有原子粒吖嘛，所以但凡若要收音者哩，就梗要呀拜候包租呀嘛，所以好多屋客又唔抵得，吓，有咗又收贵电费，总言之就无咁兴啦。唉，一出丽的呼声，所有帮衬我嘅人哩喺嘅门口呀，一定系锺意听嘢嘅嘛，所以好多哩都校咗呀，校咗就令我哩，晚晚出档无交易啦，呀，所谓呀人哋一落千丈喎，一落万丈都唔止嘞！因为我向来喺呢几条街搵食吖嘛。呀，喺嘞，更重有喎，吓！所谓福无重至，祸不行单，你估乜嘢哩，惨过落井下石罗！ （唱） 唉！所谓时令不合在我本身，自从丽的市面流行。一落千丈冇人帮衬，令到我两人系极恶谋生 ………

（说） 因为佐治公园扩充建设，张此铁网氹氹圈围住，所以呀无乜人来到街市後边，所以行人来往哩，就此截止嘞，呀正所谓搵开呀，搵开十零二十蚊，忽然俾佢截咗哩，一跌跌落四五蚊一晚，搅到生活难继，难搅得掂喇，唉！过一日，过一日，搅到恐慌非常，真正令人惨荡咯。 （唱） 喺嘞，时又变，立即又变迁 ………

十月十八夜搭船系过去澳门地点呀，谁知嗰晚哩是天气又变迁，落船嗰阵呀，唉！非常热呀，随我好友正所谓大汗都涟涟。将我行囊来搬落呀，咁就後来佢回去剩我一厮。点想未到系澳门嗰个天时就变，唏吔！立即就要把衣裳补上身 ………

我初到系澳门，我估话生活好搵呀，我估从此在此地就永久安心，因为一到嗰时就有多客帮衬，一个星期唔够，客店个个亦都知有我此人。正所谓估话地头合得我呀，合我一生命运啩，估话在此居留就可有根，日过夜来皆一样呀，生意向来又极之匀。光阴系易过喇一定唔需问呀，生活系好哩，生活好就定然系嘅安心 ……… （说） 唉！估话逃到澳门好安乐啦。一到个埠呀，一个星期所有咁多客店呀，除咗中央之外呀，真系好多间客店都知道有我本人，过咗去嚟卖唱。所以哩，在嗰年呀去到，晚晚出档真系可谓讲得应接不暇咁巴闭嘅。吓，咁呀好啦，正所谓在香港捞到呀，吓，绝地之时，到澳门，唉！估话死而复生呀，非常个心安定嘞。

（说） 真系好景不常罗，非系呀月在十五呀一转，转咗十一月初八夜，一到八点钟，连响呀爆炸弹，此所谓计时炸，市面上当堂大变嘞，鸡飞狗走，人心徬徨，由此哩，又遇天时甚冻噃，吓，真系福无重至，祸不行单咯。啱啱嗰年呀，最冷嘅，咁呀冷到油晾（凝结） 咁巴闭嘅，最冷得耐。唉！当堂一落千丈嘞，晚晚出档都栈个出嘞，吓！打一个转哩成一个虚嘞。好罗！正所谓由初八而起，一路呀，吓！渐渐皆沉竟然想吓想吓，弊嘞，揸住二百元港纸在澳门，呀！生意几好，有些少。喺嘞，都唔够，正所谓呀，唔够系二十日，冚崩唥蚀清光，想吓剩得二十元，哎吔，咪拘嘞，人地生疏，想吓不如死咗返做香港，做土地喎。所以揸住二十元，立即向我哋好老友行家拜辞哩，立即回来嘞，凶吉都未晓。 （唱） 真系世间哩难嘅料㗎，果然真， 竟然作个虚，咁就作为虚梦呀，系几个月辰。

哩，我一回港呀，寻到呢个旧街坊，得佢容纳就把我收藏。总系居住哩就许多唔便当，因为哩，俗语小地方，佢夫妻一对系在此居楼上咋，一男一女系居住闲床，焉能将我来相让呀？使我安寝嗰时欠地方 ……… （说） 我一回返到嚟三日後呀，呢个人称佢做伯父，佢就卖烟呀系红磡，听到我返咗嚟，咁呀立即叫嗰啲人呀，叫我入去问其长短。咁哩，知道我呀，吓，一向呀我嗰个房都能够让得顶得俾人，求他第去，又遇着咁嘅环境，迫不得已回来旧地，吓，知道香港地哩，留食就不留宿，所以佢哩一力招呼真系少有噃。吓，盲人在烟馆嚟到栖身呀，我信得过历古至今都由我一人罗！ （唱） 所谓不幸始终还有幸呀，得贵人护助我赖终身，叫我暂且居在系烟床隐呀，日中生活可以在此寻。

天无绝勤之路我就话正理。好，啱啱呢个人，系几时哩，哦！正七月十八日，晏昼竟然来到呀圣德山。 （唱） 闻到此呀，我正在有人请我食洋烟，忽有一人就到床前。喜气声声来将我叫，阿拐呀你今回出生天，你快些出去油麻地外边呀，快快，快快前去有维持。因为有一人要将你呀见喎，话叫你有一个系台脚令你喜欢天，或者此後生活系你靠得住。

若还合意哩，就一定系永远，佢话得到此台嘅脚，永久生活就维持。的确就系港台里呀边，由此入去天过天。从今就解决本人生活呀，正系光阴喺里边唱咗十几年。

我想人生世上呀，必要系以为谦，挚诚谦厚自有人扶持。世上哩居多自古出言就要顺人耳，若然买物哩就要把嘅钱添。此一种嘅行为非系吹抬拍，不过为人交际喇，呢种理所当然。

点想嗰年正月又寒风遍遍，生活虽然解了咋，冇寒衣。犹幸有个系我旧时屋主呀，佢到来见我系聚会了一时，佢见得我衣裳着到如此呀，见我系寒风阵阵哩，短单衣，立即去了街外边呀，就把寒衣两套等我就应时。呢一种过为都系生来命里呀，若还佢唔到我都几难捱过这个雪天。虽然寒冷少日子咋，总系寒襟难抵一阵系共一时。多谢佢连谂两件呀，咁就竟然度过嗰季寒天。

真系光阴似箭，我就回顾一九七零年，当日我在电台唱到呢套《再生缘》。适逢唱到书一本，正系皇甫少华就挂印出师。忽然嗰日就系星期五，台长发下系有一书词。嗰阵当日当值系嗰时，嗰个系林老树呀，我唱完之後接递此书，原来港台呢个节目喎，系由此中断，叫我即时本月系要唱完 ………

唉！我就初时一到喇，因为未曾习染，只得低头丧气在嘅街边。唉！我在街头唱起我都遮掩面，因为听从过往嚟到赠金钱。唉！自古为人系最紧要头一二次呀，初时去做实系架丢，习以嘅为常就唔多觉，唔觉羞耻只因为搵金钱。

唉！咁就无可奈何来私算呀，房租咁贵都系恶支持，无奈生活系找寻一切起呀。常常习惯过街边，夜夜出街来卖唱喇，唉！可惜今非昔比唔系从前，因为遍地收音人听到厌，任你街前嘅卖唱楼上亦无人知 ………

（说） 一九七一，一九七二，吓！咁就两年竟然在街头卖唱。系咁唱呀听人（等待人），俗语有句实系听人施舍，唉！初时真系垂头丧气，掩埋双面，咁嘅人，俗语有讲，做惯就唔知觉咁喇。咁呀，幸得啲行家嚟携带我去，如果无人带我去哩，嚟遮掩住哩，我相信任何都唔会，唉！出身做到呢样。咁呢啲，亦都好感谢我哋啲行家维持。因为往常呀我在电台之时，夹而且往阵呀，一向都冇同啲人嚟到群集乜滞嘅，点解哩？因为格格不入，系嘞！我哋要一系呀唱嘢赚钱，一系卜算赚钱啫，边处话谂到喺个街边嚟，吓！等於系丐食一般哩。故此呀，得佢携带，非常感谢，又系生路一条。

（说） 幸得一九七三年之时，咁呀得呢位呀，唉！我家下执笔忘字，又唔记得呢位贵姓嘅人。呢个人好慷慨嘅，好四海嘅，好肯为人嘅，咁呀见我咁艰难，孤身一个，咁佢又居然同我写一张申请格，嚟同我请咩哩？请一份公共援助。吓！嗰阵时，变咗色舞眉飞喇，无端端得多百零银，咁就变咗唔使咁辛苦，所以由此过日都极之安康竟然，亦都感谢各人维持，亦都自己命里一生之时，真系酸甜苦辣样样都捱到。唏！唔记得咁多。 （唱） 唉！今此後咋，虽属生活就无忧，援助虽然唔够啫，咁我耐耐哩就去卖唱街头。生活亦可维持够，幸得我本人无疾病呀，系确无忧 ………

咁我又提起入去军地里边，虽然耐唔错令到十分嘅安然。样样招呼，真系招呼到妥善，竟然在此系唱咗嘅两宵。吓！点想唱完我回家转呀，有人携住带住我行前，唉，谁料系崎岖嘅路径呀真立不住，连忙行吓行到田边， 点想嗰个行头唔多在意呀，或者一时大意呀，唉！我们随後嘞，“蓬”！系嘞！系咁跌下田。寒风阵阵喎，吹到我心头嘅乱呀，真正牙关打震因为湿晒罗衣。令到引路之人系唔过得嘅意，几番道歉欠言词。无奈我声声回答系唔关你事嘅，只系我为人大钝只有脚差偏 ………

哦！原来呢一个系我拍，旧日嗰个拍档系夥记，就系何臣寻搵，我问他言。原来叫我某日某时一齐去呀，去边处呀？佢话你们共我去嗰处系李宝椿，佢话我亦不知谁人所叫呀，佢都唔知道，无非两个前去系为嘅赚钱 ……… （说） 吓！我话何臣，究竟边一个叫呢？佢话佢都唔知喎。哈，我想我哋搵食真系浮到不了呀，边个都唔知嘅，佢话唔知呀。呢个叫做亚九介绍嘅，咁呀又有个唔知乜嘢姑娘咁𠻹。咁呀佢话叫我哋呀去李宝椿大厦十一楼，你最紧要唔好应承第二处。咁呀，几钱呀？佢话每人二百。咁几耐呢？佢话唱两支嘢啫。咁呀当堂就应承嘞。呀！好彩数唔使问人有人带路，乜嘢哩？何臣嘅老婆吖嘛，佢有个八婆带路，咁就一个钱唔使破费，竟然有车来接，一齐共载。 （唱） 齐欢喜呀，共佢一齐去再共一时。

哩，偶然嗰晚夜我在家里头，正系黄昏後呀，旧时初更後咋，我哋各人正在罗，正在家内系话讲西游。忽然有几个拍门来到门口呀，嗰时问过见吾休， 原来就系香港节呀，港节嘅时候，要我前去大会堂里头，就系《灰阑记》演戏时候呀，叫我在台前唱一周，便将戏里边嘅情由先唱够，唱完之後演戏跟住嘅後头。嗰时就接了呢一台年宵奏，七本时戏过了一周。俗话嘅有言台脚做完咁就赚一嚿呀，嗰时生活系几优悠。

嗰日哩有许多录音来把我近呀，唱了系两支不过系大半个时辰。先唱了嘞，〈霸王别姬〉，人人经已录咗带里时。再唱一支客途秋恨事呀，嗰日共埋唱嘅两支，唱完之後又同相聚呀。我哋成班人众系在花园，携手一齐来拍照，可惜我眼虽系唔见我又知，因为闪光阵阵在眼边来一线呀，我就方知系拍照影相时。真快乐呀共一齐，各人谦厚礼唔亏，各样，好嘞！叠齐架撑一切，亲送出门礼见系别首话题 ………

忽然嗰晚夜喇晚膳後咋，钟数系八点有加添。忽闻有叩户嘅之声估话系乜事呀，连忙所问门外时。哦！原来系门外把我高声叫喇， 我就听闻寻搵喜欢天，立即嘅行开忙启户呀，连忙见面真系越深时。原来非别个，就系顾客前来，此人年年多数叫我就唱歌，自从我入去嘅电台做咗呀，年年一日要去不慢来。原来呢一个非别位，就系佢个车夫人到叫，系咁笑呵呵。通知我得闻我就欢喜咗呀。原来又试再去系姓何 ………

可谓招待嘅周周好人事，佢阖家老幼人仲礼谦，一切谦厚，谦厚挚诚不枉佢财主呀，记得我哋少年时。 （说） 吓！哩位何耀光先生哩，阖家大细，人事确好，好谦，不枉有钱人嘅家里呀。点解哩，我记得我哋少年，曾在广州跟埋师傅去上台。你估去边处哩？吓！回忆起上来就好笑夹好笑，去嗰处叫做田心，佢田心系姓，叫做田心杨。咁呀，请我师傅去唱，我做徒弟，旧时初入门，跟佢尾喇！去到哩，你估食嘢呀，佢哋就好呀，不过我哋两师徒食哩苛待罗。茶杯哩，用嗰啲叫做葵花杯，正所谓即系等於佢啲下人所用嘅。佢哋埋边嗰啲哩，嗰阵时我在少年时，只眼好见吓，对面人我望到，系话！咁你估几苛待呀，所俾亲茶杯饮茶，系俾嗰啲妹仔呀，嗰啲洗婆呀所用嘅茶杯。食嘢哩，筷子碗亦系另自嘅，分开彼此嘅，另自我哋两师徒坐响处嗰张凳都无嘅，都系另自嘅，俾啲桥凳呀，俾嗰啲妹仔系厨房食饭嗰啲桥凳呀，俾我哋两师徒坐嘅。咁比起呢个何耀光先生嘅家人哩，真系蚊髀牛髀罗！ （唱） 真系回忆记得系在当年，故此世人品格确新鲜。回想双方人去比，天渊之别确不虚言。

细想此歌词自问唱来粗到唔系讲，歌词粗俗真系奈乜谁何。吓！幸得系嗰位何生来听呀妥喎，佢若是唔闲听我唱歌，吩咐司机来共佢录妥喎，计来咁耐唔知录咗又几多。年年系唱，钟数就难未过三个嘅，竟然一样系照录嘅，录埋我又如何。真顺意呀，钱银纸又加多，真正令得心内系悦意非常 ……… （说） 哩，咁我自从唱咗呢段，吓！何家嗰一度呀歌之後哩，吓！真系讲起个何家录咗都唔知几多。相信我唱嘅嘢佢都录咗好多嘞。净系嗰啲成套嘅冇录到啫，冇唱过吖嘛。系呀！咁呀讲到呀呢啲哩，录咗好多罗！真系录咗有八成都有。呢啲咁嘅散本嘅歌词，〈客途秋恨〉呀丶〈别姬〉呀咁嘅歌本，佢录咗我八成都有喇。咁呀有啲唔记得嗰啲唔好讲喇，记得嗰啲哩真系录咗我八成去咗嘞。咁佢家存在唔存在就唔知嘞，因为我唱嘢佢唔得闲，就叫司机录番俾佢嘅，晚头返嚟听嘅。哈！呢啲所谓人结人缘嘞。真系自问呀我唱出嚟真系惭愧非常，系哇！得佢咁敬爱，真系感谢万分。

此间系教堂，我又不晓佢是何如。至有在日间开唱系唱两支呀，头一支唱佢乃系〈贺寿八仙〉，後来唞过好似再唱多次。究竟哩再唱嗰支甚麽歌句，喺嘞，经已忘记时。嗰日哩我又得逢荣先生在此呀，相逢谈话咁就略说我知，即向我们系登记地址呀，电话号码就写晒佢知。两者客套一番佢话他日再见 ………

（说） 吓！因为前者哩，我与哩位荣先生经已初次曾经哩，喺大会堂相见哩，约谈过此事，後至到呢间教堂亦见到面噃。吓！咁呀，亦系谈过哩咁嘅事，话我叫你唱，咁呀，佢问我要几多时间哩，我话喺嘞，家阵时呀，唉！唱唔唱得几耐咋，我家阵哩吓，一个钟头都要唞两回，大概一气唱哩，顺过普通都系五个字到喇，六个字唱唔到喇。气魄赶唔上，纵使间唱都系监硬顶，咁，有时嘅精神够哩，气魄够哩，或者会唱到半个钟头，都可以系顶得掂，唱得掂。如果日或时哩，系咩哩？都系四个字到稳阵啲。无他，咁你可以一个钟头分两次唱呀咁，咁所以我应承咗，电话应承咗。咁呀嗰日系几时哩？嗰日呀都系，都系在三月时期嘞，不过几呀时起哩，我就好似忘记了喇，唔知三，二月，我都唔记得咗喇，好似咁上下嘞！二月三月咁喇，约数好似系六，七，好似七号五号呢段时期嘞。咁呀因为点解哩？我略记嗰个时期，因为我回忆应承咗呢个崇基嗰段生意哩，所以我将啲时间因过嘅。系嘞，咁呀能够可以赶得到，亦可以做得到，咁样，我就略略记得系嗰个时期。

（说） 咁呀由此哩开始话，嗰日先到富隆，先唱咗一日先，嗰日哩大约系唱咗一个钟头突啲喇。咁呀，後至唱完之後哩，荣生同我所谈，佢话从此就问我点样讲法。我话咁呀，连气唱，佢话想连气唱，我话唔得，至低限度都要隔日，所以与佢两家谈定哩，就二四六，星期二四六就到富隆唱，咁呀竟然日日期期系咁唱，每星期就唱，咁呀约数系有哩，有三两个星期可以系窒咗一日半日，一期半期嘅，总言之好似唱到系五月时期喇，咁呀唱咗有好多个钟头嘞，我就预数佢一个钟头，咁呀唱一个钟头唔止一个钟头，普通呀，咁呀唱过咩嘢哩？咁都有好多样嘢唱过，又话唱过《男烧衣》，又话唱过《客途秋恨》，呢啲种种式式嘅嘢都有，好多唱过。咁呀一气唱，竟然就唱到好似系我哋唐人嘅五月尾，咁嘅时期喇，大约系咁呀又停咗一时先喇，由此间开，咁呀，唱咗都有好多嘅时间嘞。咁佢仲俾张，一到第日佢仲俾张所谓叫做合同，有乜所谓合唔合同呀，系嘛？ 咁呀扱咗落去嘅，咁我都如是者系记埋收埋噃，我都唔失记，系嘛，人哋有咁嘅心理对自己，当然要感领人吖嘛，咁所以我现在都将佢好似人哋契据咁丢埋噃，系哩，呢啲好无问题，有乜所谓合唔合同哩，唱完算喇！咁呀，由此哩，唱佢哩一百几十个钟头嘅嘢哩，按下都不提嘞。 （唱） 吓！咁就竟然解决一轮妥当呀生活嘅问题，使我年月就唔使咁去向嘅东西。若还此事佢唔系咋，哩，我就定将月月去找生活嘅问题。

好嘞，间言少敍，咁就丢归後，等我续唱歌文一周。武二自从走到天明後，所谓百鸟开巢，又见日球。东放亮，日夕太阳等我早起梳洗已完，走去地主张，我回思昨晚我就唔应咁草莽，我哥哥分明显圣返阳，明明有嘢对我讲，我一时冲动，咁就定把佢吓慌，我想佢阴魂一定难将我抵抗呀，至令冲散咗渺渺茫茫 ………

烂大鼓（板眼） 啊哟! 我踱来踱去，踱下踱来，喂，唔得嚿啊蒜（算）！点解啊？系喽，实见啊罗啊挛。想我烂大鼓，生来，系冇乜人缘。唔系冇人缘! 不过百家憎。想我呢， 想我烂大鼓 为人系自己作贱：啊吔， 有观音系唔啊学， 学个何二趴面。想我有钱呢， 嗰阵时啊，也住到沙面。哩，我叫艇喎游河，样样都占啊先。哩！哩！哩！今晚又啊叫青啊兰，明晚叫瑞钻。有晚瑞彩喎，阿瑞珍与共阿瑞婵 ………

喺嘞，咁由此想到系在世一生，奔波与共劳碌做得一世人。由此十五佢嗰班爱帮衬，弊喇！一路至到埋年绝冇声音。咁耐无人上门搵呀，喺嘞！竟然叫做好比一个丐食人。援助虽然系有一份咋，生活咁高超焉能系过得嘅光阴？任你辛苦如何都要重再搵呀，光阴易过唧，又有费许多心神。人生荣枯得失都系由命运呀，确为半由人力是为真，若还生活系安稳呀，为人一定系好精神 ………

一向为人皆系冷淡过日子呀，但愿上天怜悯日中安稳嘅维持。皆因我残废一生又无本嘅事，只得系卖唱歌谣生活支持。竟然留得有今时今日嘅日子呀，生命仲保存谢嘅苍天。眼见许多人皆由都系难避灾劫呀，竟得一回灾险系难过一便时，我今系竟然系残躯犹在此呀，或者嗰啲灾难喎嘅未完尚属新天。呢一样哩嘅两谈分开两语，或者上天罚我应要系捱到嗰时。或者上天见，尚在安排我保留生命到此呀，两样哩嘅如何尚未得知。一人来想一便呀，各人嘅念向任何如。不过我一生人为寒贱呀，人人不合命苦一支，唉，但愿世上各嘅人命运都唔好将我似呀，但愿各人命运咁就贵族嘅多儿 ………

好嘞！但愿系世间一切男女人事，人人一生快乐系过时天，但愿系各人财星大利系周时欢喜事呀，一切所见事系甜但愿各人得此听虚语，你个个系从今快乐时天，世界从今就唔见系刀兵险呀，唔见系刀兵险呀，从此见太平天下事呀鸡犬就无惊，此後各位丰裕。