歲月留痕 香港情與影
何綬畫意寫實攝影專輯 照片為回憶留下印記，為事物留下記錄，讓欣賞照片的人憑著影像去觀察、細味、猜想、回憶、甚至重溫感受。 「歲月留痕－香港情與影」展覽由六個部份組成，分別收錄畫意寫實業餘攝影家何綬的生平簡介、九巴工人、夕陽行業、行頭巷尾、家在蘇屋及兩代攝影對談，除觀賞何綬的攝影專輯，還可細看人生歷程如何影響他的攝影路途及創作，亦讓他與年青人對話，為自己的作品作解說。影片文字記錄：
簡介何綬
何綬係一位攝影愛好者，喜歡捕捉街頭巷尾嘅民生百態，同埋小市民嘅日常生活，佢將自己嘅攝影風格稱為「畫意寫實」。就等我哋嚟認識下呢位攝影發燒友嘅背景啦。戰爭與學途
何綬喺1925年出生，同媽媽、細佬喺廣州生活，父親就喺澳門打理家族嘅藥材舖。1937年，何綬同媽媽嚟香港探親，無耐就傳嚟廣州淪陷的消息，何綬就留喺香港讀書。媽媽不幸過身之後，何綬就去澳門同父親一齊生活，兼且升讀中學，因為戰事持續，父親返廣州照顧細佬，何綬就番嚟香港尋找工作機會。職業生涯
當時香港係日治時期，何綬去咗親戚嘅酒樓做散工，1950年代，佢轉職司機，為當年嘅華民政務司鶴健士(B.C.K. Hawkins)做私人司機。鶴健氏榮休番英國之後，佢再轉職九巴司機，工作咗28年咁耐。因為熱愛影相的緣故，他認識咗代理賓得相機的永記公司，喺永記工作至退休。踏上影藝之途
何綬成為業餘攝影家，係由一部相機開始。當年老闆鶴健士送咗一部德國蔡司風琴式相機畀佢，佢就開始四處獵影，同好多發燒友一樣，有時去拍攝新界大自然景 色，有時拍低香港市區嘅夜景。後來為咗工作和照顧家庭，何綬再冇閒情逸緻，去拍攝大自然沙龍相，或者上影樓影人像沙龍。佢反而隨身攜帶一部小型相機，捕捉街頭巷尾嘅民生百態，以小市民為攝影對象，好似苦力、婦女、老人、兒童等， 然後配上詩句，表達自己對個人身世和社會民生的思想同情懷。何綬鑽研攝影技術，以「畫意寫實」形容自己嘅攝影風格，佢出過好幾本相集，與讀者分享個人作品、攝影心得、對社會同世情嘅觀察同感受。何綬亦都喜歡參加攝影比賽，與影友比試，甚至參加國際沙龍，期望香港作品可以同外國作品睇齊。
